கருவிலிருந்து குரு வரை

ஒருவர் தொடர்ந்து பத்து ஆண்டுகள் ஒரே துறையில் பணியாற்றி அதன் சூட்சுமங்களைப் புரிந்துகொண்டுவிட்டால் அத்துறையில் அவர் நிபுணராகிவிடலாம். காலமெல்லாம் அந்த ஞானம் அவருக்குள் தொடரும் இதுதான் உங்களுக்குள் இருக்கும் திறமை குறித்த அற்புதமான ரகசியம்
புத்தர் தனக்குள் ஞானத்தைக் கண்டடைந்தார். புறவயமான தேடலை விடுத்து அகவயமான தேடலை அதிகப்படுத்தும்போது அது நமக்கும் சாத்தியமாகும் அந்தத் தேடலின் முடிவில் கிடைக்கும் ஞானமே கடவுள். அந்த வார்த்தையிலேயே பொருள் இருக்கிறது. ‘கட-உள்.’ உள்ளே கடந்து சென்று நாம் அடையும் பேரானந்தமான சொத்துதான் கடவுள்.
உண்மையைச் சென்றடைவதற்கு நிறைய பாதைகள் இருக்கின்றன. கடைசியில் அனைத்துப் பாதைகளும் அங்குதான் வந்து சேரப்போகின்றன. போகவேண்டிய இடம் ஒன்றுதான். பாதைகள்தான் வெவ்வேறாக இருக்கும். நாம் தற்போது இருக்கும் இடத்தைப் பொறுத்துத்தான் நம்முடைய பாதை நிர்ணயம் ஆகும்.
தன் குடும்பத்திடம் மட்டும் அன்பாக நன்றியுணர்வோடு இருந்தால் போதாது. மொத்தப் படைப்புக்கே நன்றி செலுத்த வேண்டும். ஏனென்றால், இந்த உருவாக்கம் அத்தனையும் இணைந்துதான் ஒவ்வோர் உயிரையும் வாழவைத்துக்கொண்டிருக்கிறது.
நாளை என்பது ஒன்று இல்லை. நாளை நடக்கப்போகும் சகலமும் இன்றைக்கு இப்போதே சூட்சுமத்தன்மையில் இருக்கிறது. யாரெல்லாம் இந்தக் கணத்தில் முழுமையாக ஆழமாகத் தன்னைத் தகவமைத்துக்கொள்கிறானோ அவனுக்கு எதிர்காலத்தில் என்ன நடக்கும் என்பது நிச்சயம் முழுமையாகத் தெரியும்.